العربية 
English 
إيه رأيك تقضي أجازتك السنة دي في مدينة الغردقة وتستمتع بمياه البحر الأحمر والإسترخاء في أجواءها المُنعشة.
بلو راي بتقدملك دليل أفضل أماكن سياحية في الغردقة والأنشطة اللي مُمكن تستمتع بيها هناك.
الأماكن السياحية في الغردقة:
في سهل حشيش هتحس إنك مش في مصر، لأ هتحس إنك مش في الدنيا أصلاً. المكان جميل، الشواطئ ساحرة، ده غير جمال الأسماك والشعاب المُرجانية اللي بيخلي المكان مليان بالأجانب، وبأي إتنين رايحين يقضوا شهر العسل وسط الجمال الطبيعي ده.
هناك هتقدر تعمل دايفينج وتتفرج على الأسماك والشُعاب المُرجانية اللي مش موجودة في أي حتة تانية، كمان ممكن تعمل سنوركلينج لو بتخاف من الدايفينج أو الغطس، والباراسيلنج. أما الجلاس بوت أو القارب الزجاجي ده حاجة تانية خالص، تخيل تبقى قاعد في مركب شفاف شايف جمال البحر والكائنات اللي فيه كُلها من تحتك.
سهل حشيش موجود على بُعد 18 كم جنوب الغردقة.
الجونة موجودة ضمن قائمة أشهر وأفضل مواقع الغطس على مستوى الشرق الأوسط والدول العربية.
بتتميز الجونة بإنها بتضم عدد كبير من الجُزر الخلابة والمعروفة بلونها الفيروزي الجذاب ورمال شواطئها الذهبية. كمان الجونة معروفة بالمزارات الرائعة، المُنتجعات السياحية على أعلى مُستوى، والأسواق العالمية.
في الجونة تقدر تستمتع بالأنشطة المُختلفة زي السباحة، التزلج، وركوب الأمواج.
الجونة موجوده على بُعد 22 كم شمال الغردقة.
حي الكوثر موجود جنوب حي السقالة وهو يُعتبر من الأماكن المُميزة في الغردقة اللي تقدر تقضي فيها ليلة مُختلفة وده لإنه فيه كتير من المحلات اللي بتبيع هدايا تذكارية مصرية مُختلفة، ده غير الكافيهات، المطاعم، ومول اسبلاندا المشهور.
الغردقة فيها أماكن كتير وشواطئ مُختلفة تقدر تستمتع بأجازتك فيها. هنا، بلو راي قدمتلك بعض الأماكن المُميزة في الغردقة.