أفضل وجهات السفر في مايو

شهر مايو من أحسن شهور السنة للسفر والسياحة. الشتاء خلص، الصيف على وشك البدء، والجو لسه حلو وكمان الأسعار بتكون رخيصة في الوقت ده من السنة لإنه ميُعتبرش من شهور الذروة بسبب دخول الإمتحانات، ده غير إن الزحمة هتكون بسيطة فبالتالي هتقدر تستمتع برحلتك أكتر من أي وقت تاني.

هنا، بلو راي هتعرض أفضل وجهات السفر في شهر مايو.

جزر اليونان الساحرة:

معروفة اليونان بمُناخها المُميز والمُنعش في شهر مايو مع جُزر بحر إيجه الساحرة واللي تقدر تقضي فيها إجازة تخليك تنسى حياتك كُلها وتفضل تزورها كُل ما يكون فيه فرصة. كمان من جُزر اليونان المشهورة جزيرة سانتوريني، إيكاريا ، ليسبوس، وجزيرة كوفور، وغيرهم كتير من الجُزر اللي مالهاش حصر.

لشبونة – البرتغال:

هتكتشف إن مدينة لشبونة في مايو مُناخها بيكون أفضل من برشلونة ومدريد وهتقدر هناك تستمتع بتاريخ المدينة العريق، المتحف البحري اللي بيناسب كُل الفئات العُمرية، متحف أناستاسيو جونسالفيس بأعماله الفنية المُميزة، وغيرها كتير من الأماكن الأثرية، وأماكن الإستمتاع الترفيهية.

مصر:

درجات الحرارة في مصر في شهر مايو بتكون في أوج إعتدالها، الأجواء مُنعشة وخصوصاً بعد غروب الشمس، فـ هتقضي وقت مُمتع في زيارة أهرامات الجيزة، جولة في شارع المُعز، الحُسين وخان الخليلي.

غاليسيا الإسبانية:

أجواء غاليسيا ساحرة، رمالها البيضاء جذابة، رائحة خشب الصنوبر فيها هتاخدك لعالم تاني. في مايو هتستمتع بالشواطئ الإسبانية المُميزة زي شاطئ دي بارا، وكمان هتستمتع بالمأكولات اللي مش هتلاقيها في مكان تاني زي محار أسبانيا المُميز، طفل الحبار، الرخويات، والأخطبوط المقلي.

في مايو هتقدر تستمتع بإجازة مُميزة، بأرخص الأسعار، قبل الزحمة، وفي وسط أجواء مُنعشة.