إزاي تستمتع بالسياحة في اليونان

لو كُنت من عُشاق السفر فـ مفيش شك إنك تكون زرت اليونان مرة على الأقل في حياتك أو حتى ضيفتها في قايمتك. اليونان بلد ساحر بيوفر لك كل وسائل الإستمتاع من الجُزر العظيمة، التُراث العريق، أو المواد الطبيعية ووسائل الراحة اللي بتساعدك تمنح جسمك التجديد اللي بيحتاجه.

في المقال ده، هنقولك على 5 حاجات لازم تعملها لو سافرت اليونان:

• زيارة الجُزر: اليونان فيها أكتر من 2000 جزيرة غير مأهولة بالسُكان. أكيد مينفعش تزور اليونان من غير ما تستمتع بالطبيعة الخلابة في جزيرة سانتوريني خصوصاً لو كُنت في رحلة شهر عسل. الجزيرة دي مشهورة ببيوتها البيضاء وقبابها الزرقاء والرومانسية اللي بتخطفك لعالم تاني، ده غير جزيرة ساموس، رودس، خيوس، وغيرهم كتير.

• الإستجمام: جسمك مُجهد وتعبان من إرهاق طول السنة وكُل فين وفين لما بتقدر ترتاح شوية؟ طيب بما إنك كده كده رايح اليونان يبقى إوعى تضيع الفرصة دي في إنك ترجع النشاط لجسمك. اليونان فيها نباتات ومعادن ومواد طبيعية مفيدة جداً للبشرة والجسم وبيتصنع منها أهم مُنتجات العناية بالبشرة. كمان سعرهم مش غالي، يعني خُدلك شوية وإنت راجع كمان علشان تكمل الإهتمام بجسمك وبشرتك من بيتك.

• زيارة جبل آثوس: الجبل ده ليه قصة لوحده … ده واحد من الأماكن القليلة حول العالم اللي بيحظر على الإناث زيارته سواء كانوا سيدات أو إناث الحيوانات، وده لإن في إعتقاد قديم بيقول إن السيدة مريم العذراء عدت على الجبل وهي في طريقها لقُبرص، وعجبها جداً لدرجة إنها طلبت من إبنها إنه يمنحهولها ومن وقتها إعتبرته ملكها وعلشان كده المنطقة إتسمت بـ “حديقة أم الرب”، وكانت هي الوحيدة المسموح لها بتمثيل النساء على الجبل.

• زيارة مدينة ميستراس: بيُطلق عليها روعة موريه. مدينة ميستراس موجودة في مدّرج حول القلعة، بتتميز بتاريخها العريق وده لإن البيزنطيون فتحوها ومن بعدهم الأتراك والبنادقة وبعد كده المدينة هُجرت تماماً سنة 1832، وماتبقاش منها غير مجموعة عظيمة من الآثار اللي بتنتمي للقرون الوسطى.

• زيارة مسرح دلفي: مسرح دلفي واحد من أهم معالم التراث العالمي في اليونسكو، مبني على تلة عالية في القرن الرابع قبل الميلاد، وبيحتوي على 35 صف ويقدر يضُم 5000 مُتفرج. المُبهر في المسرح إن جودة الصوت فيه رائعة بحيث بيوصل لكُل الجمهور بوضوح. ومن على المُدرجات بتقدر تشوف المسرح كُله مش بس كده ده إنت كمان بتقدر تشوف حرم واوراكل لابولو كله والمناظر الطبيعية الخلابة تحته.

الخُلاصة

لسه في حاجات كتير ممكن تتعمل في اليونان، تابعونا في المقالات الجايه علشان تعرفوا عنها أكتر.