إعرف أكتر عن رياضة تسلق الجبال

رياضة تسلق الجبال رغم صعوبتها وإن ناس كتير بتشوفها من الرياضات الخطيرة، إلا إن ناس كتير برضه بيمارسوها وبينجذبوا ليها وده لإنها بمثابة تحدي كبير لنفسهم، ده غير إن حُب الناس للطبيعة والجبال والحياه الهادية سبب رئيسي في إنجذاب الناس لرياضة تسلق الجبال. تعالوا نعرف أكتر عن رياضة تسلق الجبال

فوائد تسلق الجبال:

1. بيزود الإعتماد على النفس،
2. بيزود الثقة في النفس،
3. بيشبع رغبة الفرد في إحساس المُغامرة،
4. بيقوي روح الفريق والتعاون،
5. السفر حول العالم،
6. وأهم حاجة طبعاً إن التدريب للرياضة دي بيساعد على اللياقة البدنية والصحة الجُسمانية.

أبطال تسلق الجبال:

• عمر سمرة:
  عمر سمرة هو أول مصري يتسلق أعلى قمة في العالم “قمة جبل إيفرست” اللي ارتفاعها 8848 متراً، في رحلة خدت منه حوالي 6 أسابيع وده سنة 2007. إيفرست مكنش أول جبل يتسلقه عمر وده لإنه لازم يتدرب قبلها كتير وعلى قمم جبال كتير علشان يقدر يحقق البطولة دي. المُلهم في القصة إنه كان بيعاني من صُغره من الربو اللي كان بيخليه حتى ميقدرش يلف تراك النادي، رغم كده إتحدى مرضه والظروف المُحيطة علشان يحقق حلمه.
• السير إدموند هيلاري:
  مُستكشف نيوزلندي وهو أول مُتسلق لـ قمة إيفرست في العالم. أول تجربة لـ إدموند هيلاري في تسلق الجبل فشلت تماماً وفقد 3 من أصدقائه خلالها، رغم كده الحكومة إدتله وسام وعملوله حفل تكريم وفي الحفلة وقف قدام صورة الجبل وقاله: لقد ربحت أنت هذه المرة، أنت كبير بقدر ما ستكون، ولكني أنا الأكبر بإستمرار.
  وسنة 1953 نجح في مُحاولته التانية هو وتينسينغ نورغاي في الوصول لقمة جبل إيفرست.
• راينهولد ميسنر:
  رغم إنه مش أول شخص يتسلق جبل إيفرست إلا إنه يُعتبر من أعظم وأشهر مُتسلقي قمته في العالم وده لإنه أول شخص يوصل لقمة الجبل من غير أكسجين صناعي. الموضوع كان مُخاطرة كبيرة جداً وده لإن الأكسجين في قمة إيفرست بيكون حوالي 6% بس، الموضوع ده بيأثر على مُخ وجسم الإنسان فـ بيتحرك وبيفكر بأقل من نُص كفاءته ومبيكونش قادر ياخد قرارات صح.
  ميسنر كان معروف عنه إنه من عُشاق الطبيعة ده غير إنه مارس رياضة التسلق أكتر من 2500 مرة تقريباً.

رياضة تسلق الجبال واحدة من رياضات كتير عظيمة بيتم مُمارستها حول العالم.

تابعونا علشان تعرفوا معلومات أكتر عن السياحة والرياضات حول العالم.