استمتع بفطار مغربي في رمضان

باقي على رمضان كام يوم والناس كلها بتستعد للعزايم وتجهيز أنواع الفطار المُميزة والحلويات بتاعت رمضان اللي مبتحلاش غير في رمضان وسط العيلة واللمة.

طب ليه ما تفكرش في فطار مُختلف السنة دي وتجرب أصناف مُختلفة وجديدة من الأكلات.

بلو راي جابتلك شوية أكلات مغربية علشان تعيش أجواء رمضان بطعم مغربي أصيل.

• شوربة الحريرة من أهم الأصناف المغربية الرئيسية على مائدة فطار رمضان وده لإنها تُعتبر وجبة غذائية مُتكاملة بتحتوي على فوايد كتير لجسم الإنسان منها الخضار، القرفة، الحمص، الزنجبيل، البقدونس، والكزبرة، ولسان العصفور،

• البريوات تُعتبر واحدة من أشهر الأكلات المغربية واللي ممكن تتحضر بطُرق مُختلفة يعني ممكن تكون محشية جبنة، لحمة، خضار، أو تتعمل كصنف حلو وتتحشي لوز ومكسرات،

• السلطات المغربية زي سلطة الزعلوك المغربي اللذيذة وهي عبارة عن سلطة بتنجان بتتكون من بتنجان مشوي أو مسلوق، طماطم، بقدونس، وبُهارات مُختلفة. مش بس كده، ده كمان فيه سلطة تكتوكة المُميزة واللي بتدي طعم مختلف للأكل،

• أمّا بالنسبة للحلوى المغربية، فلازم تجرب الشباكية، البغرير، السفوف، والكيكس والملوزة والكعب والكيك بالفلو وحلوى التمر، وغيرها كتير من الحلويات اللذيذة.

المطبخ المغربي مطبخ مُتنوع وده بسبب تأثر ثقافة المغاربة بالثقافة العربية، الأمازيغية، ثقافة أفريقيا، والشرق الأوسط، والبحر المتوسط. ده غير إنه يُعتبر المطبخ المغربي الأول عربياً وأفريقياً، والتاني عالمياً بعد فرنسا.