السياحة في جورجيا

تعرف إيه عن جورجيا ؟ عن السياحة في جورجيا ؟ أو عن الحاجات اللي بتشتهر بيها ؟

علشان جوريجيا واحدة من أجمل المناطق السياحية اللي لازم تحطها في قايمتك للسفر، بلو راي جابتلك كُل المعلومات اللي هتحتاج تعرفها عنها.

الموقع :

جورجيا موجودة في منطقة القوقاز على غربها البحر الأسود، على شمالها روسيا والشيشان، أمّا على الجنوب فهتلاقي تركيا وأرمينيا وأذربيجان. كمان بتتميز جورجيا بإنها مقسومة على قارتين بمعنى إن الأراضي الجنوبية ليها موجودة في قارة آسيا، أمّا الأراضي الشمالية فموجودة في قارة أوروبا.

السياحة في جورجيا :

شارع روستافيلي :

شارع روستافيلي الموجود في العاصمة الجورجية “تبليسي” واللي بيمتد لمسافة كيلو ونص، يُعتبر من أشهر شوارع المدينة وده لإنه بيضُم مجموعة من الأماكن السياحية العريقة زي: المتحف الوطني واللي هتقدر تتفرج فيه على مجموعة قطع فنية ورسومات وفنون زخرفية بتوصل لحوالي 30000 قطعة فريدة، أوبرا تبليسي ، مسرح الدولة للبالية، البرلمان، مبنى الأكاديمية الجورجية للعلوم، ومتحف سيمون جاناشيا واللي بيضُم حوالي 1200000 قطعة آثرية،

قلعة غورى:

كلمة غوري بالعربي يعني تل وعشان كده القلعة أخدت نفس الإسم لإنها موجودة على قمة تلة صخرية. سجلات المؤرخين بتقول إن قيصر هرقل هو اللي بنى القلعة علشان يخزن فيها الأسلحة اللي بيستخدمها في المعارك ضد الفرس في القرن السابع.
في القلعة هتقدر تستمتع بمُشاهدة الإكتشافات الأثرية الفريدة، ده غير اللوحات، الصور، وكتير من القطع الأثرية التاريخية،

المُنتجعات الصحية:

تبليسي عاصمة جورجيا مشهورة بالمياه الكبريتية والمعدنية وده كان سبب في إنتشار كتير من حمامات التدليك “SPA” اللي بتقدم خدمات علاجية كتير زي علاج أمراض الربو، الروماتيزم، وغيرهم كتير، ناهيك عن قدرتها العظيمة على توفير الراحة والإسترخاء لعضلات الجسم،

أهل جورجيا:

من أكتر الحاجات اللي بتميز جورجيا هو كرم أهلها وحُسن ضيافتهم اللي كانوا سبب في تشجيع السُيّاح على زيارتها أكتر من مرة.

بعد كُل الحاجات دي ماتترددش للحظة إنك تحُط جورجيا في أول قايمتك للسفر.