الفلانتين في 5 بلدان حول العالم

بما إن انهاردة يوم الفلانتين في مصر واللون الأحمر هو الدليل على الحب عند المصريين وبنلاقي الشوارع مليانة بنات وأولاد باللبس الأحمر والدباديب والورد في كل مكان، عشان كده بلو راي فكرت إنها تشارك معاكوا المظاهر المختلفة للفلاتين حول العالم. تعالوا نشوف مع بعض:

1- ماليزيا والبرتقال: ايوه البرتقال مهم جداً في ماليزيا يوم عيد الحب، وده لأن البنات هناك في اليوم ده بيكتبوا أرقام تليفوناتهم على البرتقال وبعدين يرمُوا البرتقال ده في أقرب نهر وبيحطوا أمنيات إن البرتقالة اللي عليها رقم التليفون توصل لفتى الأحلام… طريقة ماليزية جديدة في الحب،

2- كوريا الجنوبية والمكرونة: وهنا نقدر نقول إن كوريا الجنوبية عندها يوم أبيض ويوم أسود. بس خلونا الأول نقول إن يوم 14 فبراير هو الفلانتين في كوريا الجنوبية والبنات هى اللي بتعبر عن حبها للولاد وبيجيبولهم هدايا. أما اليوم الأبيض واللي بيوافق 14 مارس، الشباب هما اللي بيجيبوا هدايا للبنات ولازم تكون 3 أضعاف الهدايا اللي جاتلهم من البنات. أما اللي مش مرتبطين وماجلهومش هدايا أو حلوى في اليوم الأبيض، فبيكون يوم 14 أبريل هو يومهم في الحداد على حبهم الضائع وبيروحوا لمطعم صيني ويأكلوا مكرونة سوداء كنوع من أنواع الحداد،

3- الدنمارك والبيضة: خلينا نقول إن الدنمارك طريقتها تقليدية في الإحتفال بعيد الحب بس بدل الورد الأحمر بيستخدموا الورد الأبيض. لكن فيه طريقة رومانسية بتشتهر بيها الدنمارك في عيد الحب وبتعتبر من التقاليد الخاصة وهي إن الولد بيبعت قصيدة حب قصيرة للبنت ويكتب إسمه على شكل نقط ولو نجحت البنت في إنها تعرف مين اللي بعتلها القصيدة، بيقوم الولد يبعتلها بيضة في عيد الفصح،

4- إيطاليا والشوكولاته: الإحتفال بعيد الحب في إيطاليا تقليدي عن طريق الورود والهدايا والشوكولاته، إلا إن عندهم حاجة مُختلفة وهي إن الفتيات العازبات بيصحوا بدري قبل شروق الشمس في اليوم ده لأن فيه مُعتقد إن أول رجل أعزب هتقابله، هتتزوجه خلال سنة. كمان من أكتر الهدايا انتشاراً في إيطاليا هي شوكولاته بالندق أسمها Baci Perugina وبتكون مُغلفة بورقة مكتوب عليها أقول للحب بـ 4 لغات مُختلفة،

5- فرنسا والرسم والصور: من الطرق القديمة التقليدية للإحتفال بعيد الحب في فرنسا واللي معروفة بإسم “الرسم من أجل الحب”، بتكون عبارة عن إن الرجل بيقف قدام المنزل وينادي على البنت من الشباك لحد مالبنت توافق على مواعدته. كمان في اليوم ده، البنات بيجمعوا صور الولاد اللي مانجحوش معاهم في علاقات عاطفية وبيحرقوا الصور دي.

قولنا إنت من أنهو بلد وبتحتفلوا بالفلانتين في بلدك إزاي!