تعرف إيه عن جسر التنهدات في إيطاليا؟

السياحة في إيطاليا مليانة مفاجأت وإنبهارات حرفياً، يعني مثلاً حاجة زي جسر التنهدات ده فن وعمارة عظيمة ووراه قصة مشوقة تخليك تحلم تزوره. خلينا نتعرف أكتر مع بعض على قصته.

جسر التنهُدات بدأ بناءه سنة 1600 وهو موجود في البندقية، شمال إيطاليا، ويُعتبر من أعظم وأروع الأعمال المعمارية في عصر النهضة وده لإنه معمول من الحجر الجيري الأبيض اللي بيديله شكل جذاب وراقي. كمان بيحتوي على شبابيك عليها قضبان.

إيه قصة جسر التنهدات ؟

في قصص كتير أشهرها إنه الجسر كان مُصمم مخصوص علشان ينقل المساجين من قصر دوجي اللي بيتم إستجوابهم فيه لزنازينهم في سجن بريجوني على الناحية التانية أو للمكان اللي بيتم تنفيذ فيه عقوبة الإعدام عليهم.

يُقال كمان إن السُجناء لما كانوا بيمروا على الجسر كانوا بيتنهدوا وهُما بيلقوا نظرة أخيرة على العالم وعلى جمال مدينة البندقة “فينيسيا” قبل دخولهم السجن علشان كده إتسمى جسر التنهيدات.

المعماري اللي بنى الجسر هو أنطونيو كونتينو وعمه يبقى المعماري أنطونيو دا بونتي اللي بنى جسر ريالتو واللي بيمتد على القناة الكبرى في البندقية.

الشاعر الرومانسي لورد بايرون كتب عنه في قصيدته “رحلة تشيلدي هارولد المقدسة” وقال: وقفت في البندقية، على جسر التنهدات، قصر وسجن في كل ناحية.

من كُتر حُب الإيطاليين في الجسر وإنبهارهم بالفن المعماري المبذول فيه، تم نقش إسمه على العُملات في القرن الـ 17.

،كمان في أسطورة قديمة بتقول إن العشاق اللي بيحصلوا على قُبلة تحت الجسر في الجندول وعند غروب الشمس هيُقدر ليهم السعادة والحب الأبدي مع بعض.