بورا بورا … أرخبيل هيأخد عقلك

من على بُعد 257 كيلومتر شمال شرق جزيرة تاهيتي ومن جوه الأرخبيل البحري في بولينيزيا الفرنسية في المحيط الهادي، هنشوف معاكوا واحدة من أروع وأجمل الجُزر اللي مُمكن تشوفها في حياتك وهى جزيرة بورا بورا.

أصل الحكاية

خلونا نقول إن فيه مجموعة جُزر جنوب جزيرة هاواي إسمها “جزيرة المُجتمع”. جزيرة المجتمع دي مقسومة نصين وهما جُزر ليوارد وجُزر ويندوارد. فـ جزيرة بورا بورا هى جزيرة من مجموعة جُزر الويندوارد.

أما عن الإسم أو سبب التسمية، فكلمة “بورا بورا” في اللغة التاهيتية معناها “المولود الأول”، وعلى حسب كلام المؤرخين إن الرحالة البولينيزيين لما وصلوا الجزيرة في القرن التاسع الميلادي، هما اللي سموّا الجزيرة بـ “فافاو” واللي مع الوقت بقى إسمها بورا بورا لما تم إكتشافها بعدين.

السياحة فى جزيرة بورا بورا

مُناخ بورا بورا مُناخ نقدر نقول عليه إنه مُعتدل طول السنة، كمان جُغرافية الجزيرة مُميزة جداً وده لإن طبيعتها بُركانية وفي وسط بحر فيروزي، ده غير الرمال البيضاء والجمال الخلاب بتاع الجزيرة. بس مش معنى إن طبيعة الجزيرة إنها بُركانية، إنك مش هتلاقي كائنات هناك، بالعكس هتلاقي كائنات بحرية فريدة من نوعها زي السمك المُلون، السلاحف البحرية، الدلافين، وغيرها.

أما لو بتحب الشواطئ والرمال البيضاء الناعمة والمياة الفيروزية، يبقى أكيد مش هتفوت إنك تزور شاطئ ماتيرا واللي بيُعتبر واحد من أهم شواطئ بورا بورا الرئيسية. مش بس كده، ده كمان فيه  شواطئ الشعاب المرجانية واللي هتخليك تستمتع برياضة الغوص وتشوف وتستمع بالشعب المرجانية المُلونة. كمان هتلاقي في بورا بورا، جبل Mt Otemanu واللي بيُعتبر أكبر جبل بركاني وكمان جزيرة Motu Tapu واللي هتخليك تنسى نفسك وتسترخي وتستمع بالهدوء زي ما إنت عايز.

أكيد مش هتفوت جمال زي ده وماتزورش جزيرة بورا بورا.