جولة داخل ريوكان ياباني أصيل

أكيد كُلنا بنشوف صور النُزل أو فنادق اليابان التقليدية واللي بتوحي بالهدوء والسكينة، بس مين يعرف إسمها أو تفاصيلها؟

تعالى ناخدك في رحلة داخل ريوكان ياباني …

ريوكان هو الإسم اللي بيُطلق على فنادق اليابان التقليدية واللي ما زالت مُحتفظة بأصول الثقافة اليابانية.

بتتميز بإختلافها عن أي فُندق في العالم بطرازها المعماري وشكلها الخاص.

فمن لحظة دخولك الريوكان، لازم تقلع حذاءك وبيوفرولك خُفين تقدر تستعملهم طول ما إنت جوه ووقت ما تحب تتمشى بره الريوكان تقدر تستعمل قبقاب ريوكان الخشبي اللي بيُطلق عليه إسم (غيتا) ومش مسموح ليك تمشي بالخفين فوق التاتامي وهو الحصير اللي بيكون مفروش في أوض الريوكان ووقتها تقدر تستعمل شراب أو تمشي حافي لأن التاتامي بتكون نضيفة جداً.

بالنسبة لديكورات الريوكان، فهي هادية ومُميزة بلوحات الزهور المُنسقة على أساس فن “إيكيبانا”، ده غير الأبواب الورقية بإطارات قُضبانها خشبية وطبعاً السرير الياباني المُميز اللي بيُطلق عليه إسم (فوتون) واللي بيكون مفروش على الأرض.

بالنسبة للإستجمام، فتقدر تستمع بحمام ساخن في الهواء الطلق وبيكون طبعاً مُزود ببعض الوسائل الترفيهية بس غالباً الغرض من زيارة الريوكان بيكون الإستجمام والهدوء وبعد ما تطلع من الحمام تقدر تجرب الزي الياباني التقليدي (يوكاتا).

أمّا بالنسبة للأكل، فهتجرب هناك أحلى مأكولات في حياتك، ده غير النضافة والنظام. في البداية هيسألوك لو حابب تاخد وجبتك في المطعم ولا في الغرفة. لو إخترت الغرفة هتجيلك الموظفة المسؤولة واللي بيُطلق عليها (ناكاي) علشان تجهزلك الأكل وترتب الأصناف بالنسبة لأنواعها. المأكولات بتكون طازجة لإنها بتتحضر في نفس اليوم. الفطار على سبيل المثال بيكون عُبارة عن رز وحساء الميسو الياباني وسمك مشوي ومخلل ياباني.

الريوكان من الأماكن المُفضلة لمُعظم المشاهير حول العالم. على سبيل المثال، ستيف جوبز كان دايماً بيقضي وقته في ريوكان “تاوارا يا” اللي عُمره بيبلُغ تقريباً 300 سنة.