إزاي تتغلبي على العقبات اللي بتواجهك في حلم السفر؟

مين فينا معندهاش حلم السفر بره للدراسة، للشغل، أو حتى للسياحة؟ طيب كام واحدة فينا قدرت تسعى ورا حلمها وتدور على الفرص المُناسبة علشان تبدأ المرحلة الأصعب وهي إقناع الأهل بالفكرة؟

الفكرة صعبة بس مش مستحيلة، خلينا نتناقش في أهم عقبة بتواجهنا كُلنا كـ بنات في فكرة السفر بره لوحدنا وهي إقناع الأهل، وإزاي نتغلب عليها.

1. لازم قبل ما تبدأي أي نقاش معاهم، تدوري كويس عن المكان اللي عايزه تروحيه، تقري كويس وتفهمي كُل حاجة عنه. الموضوع مش عِند، إنتِ كمان لازم تطمني من الآمان والسلامة في المكان ده عشان تقدري تطمنيهم،
2. متروحيش تفتحي الموضوع من غير ما يكون في فرصة حقيقية قدامك لإنهم مش هيهتموا غالباً وهيكون ردهم إن لما تلاقي حاجة إبقي قوليلنا. علشان كده جهزي فرصة كويسة علشان تحسسيهم أد إيه الموضوع جدي مش مُجرد كلام في الهوا،
3. حتى لو إنتِ مقتنعة جداً بالفرصة اللي قدامك ومتعودة إنك مُستقلة دايماً وبتاخدي قراراتك لوحدك، خُدي رأيهم أكتر في الفُرصة وحسسيهم إن من غيرهم مش هتقدري تقرري علشان هُما أكيد أكتر ناس هينصحوكي بـ أفضل حاجة. الأهل لمّا بيحسوا بـ أد إيه إحنا محتاجينهم بيدعمونا أكتر من العادي،
4. إوعي تستني رد في نفس الوقت، إطرحي الموضوع بكُل تفاصيله اللي مُمكن يسألوا عنها وقوليلهم يفكروا براحتهم وبعد كام يوم ناقشيهم تاني، ده هيخليهم يحسوا إنك بقيتي شخصية ناضجة، غير إن الموضوع مش بسيط وأكيد هيحتاج تفكير كبير منهم،
5. كمان مُهم إنك تجمعي أمثلة عن بنات مروا بنفس التجربة دي وإزاي قدروا ينجحوا فيها بدعم وثقة أهلهم فيهم. عرفيهم إنك مش بس محتاجه موافقتهم لأ كمان دعمهم المعنوي علشان تقدري تثقي في نفسك أكتر وتنجحي.

الخُلاصة

على إختلافنا وإختلاف طبقاتنا ومستوياتنا الإجتماعية، في الآخر سبب الرفض الأول والأخير في أغلب الوقت بيكون خوف علينا، علشان كده بلاش تعندي وحاولي معاهُم بكل طُرق الإقناع بمُنتهى الهدوء والنُضج.