سمعت عن فوائد السفر الـ 20 مش الـ 7

دايماً لما بتيجي سيرة السفر والرحلات، بيجي في بالنا العبارة الشهيرة بتاعة “للسفر سبع فوايد” ونبدء نسمع نفس الكلام اللي كلنا عارفينوا وحفظينوا. لكن، انهاردة بلو راي وهي بتدور، لاقيت إن السفر مش بس ليه سبع فوايد، لأ دول 20 … تعالوا معانا نعرف إيه هما

فوائد السفر الـ 20:

1. أكيد كلنا بنعاني من الروتين اليومي في الشغل وكم إرهاق وضغط فظيع .. عشان كدا السفر بيخليك تسترخي وتجدد نشاطك وبكدا تقدر ترجع شغلك بكل نشاط وحيوية،
2. فيه جانب نفسي تاني من فوايد السفر وهو لو إنت عندك إكتئاب بسبب الضغط في الشغل اللي إتكلمنا عنه قبل كدا، فالسفر بردو بيخليك تتغلب على الإكتئاب دا وإنك تجدد نشاطك من جديد،
3. كمان السفر بيساعدك في إطلاق العنان لخيالك وبيخليك أكتر إبداعاً،
4. أما لو إنت مالنوع اللي بيحب العلم وعندك شغف بالتطلع على الجديد، فأكيد السفر بالنسبالك هيبقى أحسن حاجة ليك وهيساعدك إنك توصل للعلم اللي إنت محتاجه،
5. كمان السفر بيخليك تتعرف على ثقافات وحضارات وعادات وتقاليد مُختلفة اللي أكيد بتأثر فيك وفي شخصيتك،
6. أما لو هنتكلم عن الجانب الثقافي أكتر، فنقدر نقول إن السفر من أهم العوامل اللي ساعدت في إنتقال العلوم والآداب من بلد لتانيه وكمان العلوم التاريخية والعادات الإجتماعية،
7. أما لو إنت مالنوع الإجتماعي اللي بيحب يكون علاقات وصداقات كتيرة مع ناس مُختلفة، فالسفر أكيد غنيمة كبيرة جداً بالنسبالك،
8. أما لو إنت عايز تجرب إحساس المسؤلية وإزاي تدبر أمورك وإحتياجاتك بنفسك، فالسفر يُعتبر أكتر فرصة بتخليك تقدر تعتمد على نفسك،
9. ولو هنتكلم عن السفر من الناحية الدينية، فالسفر بيخليك تأدي فروض ومناسك دينية زي الحج والعمرة ومتنساش إن دعوة المُسافر مُستجابة،
10. أما لو هنتكلم عن الجانب الإقتصادي، فالسفر هو شكل من أشكال طلب الرزق وزيادة الدخل، وده في حالة إن جالك فرصة سفر للشغل أحسن بره بلدك،
11. لو هنتكلم عن الناحية العلاجية، ففي بلاد مشهورة بتقدم الطب فيها وبلاد تانية فيها أماكن علاجية ورمال ومياة كبريتية بتساعد في الشفاء من بعض الأمراض،
12. كمان السفر ممكن يكون عشان الترفيه وبس، وإنك محتاج تغير المكان والناس اللي بتشوفهم كل يوم،
13. أما لو إنت من النوع اللي بيخاف وعنده وسواس من المجهول، فالسفر بيعلمك إزاي تتخلص من الخوف ده وتعتمد على نفسك،
14. كمان السفر بيديلك ثقة في النفس لأنك بتكون لوحدك وبيخليك تكتشف جوانب جديدة في شخصيتك،
15. أما لو بتحب المُغامرة، فالسفر بيخليك تسافر بلاد مختلفة وتستكشف أساليب حياة وحاجات مختلفة عنك،
16. كمان فيه بلاد مشهورة برياضات المغامرة، فده بيخليك تعيش جو المغامرة ورياضات تسلق الجبال وغيرها،
17. السفر كمان بيخليك ترضي فضولك في إنك تعيش أجواء مُختلفة في بلاد جديدة عليك،
18. كمان السفر بيزود عندك صفة الصبر وإنك تبقي أكتر مرونة في التعامل، وده لإنك بتكون لوحدك فبتتعلم الصبر والمُثابرة،
19. السفر كمان ممكن يساعدك في فتح فرع جديد لشغلك في مكان جديد مع ناس جديدة وبداية جديدة،
20. وأخيراً، السفر بيخليك تكتشف نفسك وقدرات فيك إنت ماكنتش تعرفها قبل كدا.

الخُلاصة

لو عايز تجدد من نشاطك ومن حيويتك وترجع شخص مُقبل على الحياة من جديد، فأكيد السفر هو أنسب حل ليك.