شاطيء الرمال الوردي .. ياترى فعلاً وردي؟

رمال الشواطيء مش بس لونها أصفر وأبيض زي ما دايماً بنشوفها، والدليل إن مُعظمنا شاف صور كتير من شاطيء الرمال الوردية في جزيرة هاربور، جزر البهاما. صور مُبهرة وجميلة وكلنا بنتمنى نروحه. فـ إيه أجمل من إنك تقضي وقت على شاطئ رماله وردية ومياه البحر الفيروزية الصافية قدامك إلى ما لا نهاية؟

طيب إيه حكاية لون شاطيء الرمال الوردي ؟

سبب اللون الودري أو البينك هو وجود شُعاب مُرجانية ومخلوقات بحرية ليها هيكل أو صدف لونه وردي ولما بتموت أو تتكسر القشرة الوردية بتجذبها الأمواج للشاطئ فبتكَوَن اللون اللي بنشوفه ده.

بس ياترى الرمال فعلاً بنفس درجة اللون الوردي اللي مُنتشرة على إنستجرام؟

الحقيقة لأ.. رمال الشاطئ واخده درجة بسيطة من اللون الوردي بعيدة عن الصور المُنتشرة على وسائل التواصل الإجتماعي. رغم كده، ده ميقللش أبداً من روعة وجمال المكان، المياه فيه صافية إلى أبعد الحدود، الجو حلو جداً، والبيوت المُنتشرة بألوان الباستيل والأسوار البيضة اللي شكلها يخطف الأنظار.

يعني لو بتدور على رحلة شهر العسل، سفرية مُختلفة مع أصحابك، أو إجازة تبعد فيها عن ضغط الشغل والحياة، فالشاطئ الوردي هيكون إختيار مُناسب جداً ليك.

أما الشكل المعماري للبيوت هناك عُبارة عن مزيج من الطراز الإستعماري البريطاني التقليدي مع التصميم المُعاصر، يعني منظر رائع ومُختلف عن التصاميم المعمارية اللي متعود تشوفها.

ده غير المطاعم اللي بتقدم مأكولات بحرية لذيذة مُستخرجة من البحر الكاريبي واللي صعب تلاقيها في مكان تاني.

إستمتع بـ إجازة مُختلفة السنة دي في جزر البهاما!