عايز اسافر – أبدأ منين

مفيش حد فينا مابيحلمش بالسفر بره سواء للفسحة أو للشغل، لكن أول ما بنسمع كلمة سفر بيطلع لنا “بعبع” الفيزا، جواز السفر، وحاجات تانية كتير بتخضنا وبتخلينا نفكر كتير قبل السفر وساعات بنفضل نأجل لحد ما فرصة السفر تضيع علينا، عشان كدا بلو راي فكرت إزاي تساعدك وتقولك تبدء منين خطوة خطوة بالتفصيل:

1. البطاقة الشخصية: أيوه زي ما أنت قريت كده “البطاقة الشخصية”. خليني أقولك إن جواز السفر والتأشيرة وكل الحاجات اللي بتسمع عنها دي بتبدء بالبطاقة الشخصية. لازم تتأكد إن بطاقتك مش مُنتهية ولو مُنتهية، جددها. كمان لازم يكون مكتوب فيها إنت بتشتغل إيه وده لإن البلد اللي إنت هتسافرلها أكيد مش هتبقى محتاجة إنها تدخل ناس عاطلة عن العمل وتبقى عبء على البلد. طب لو مش بتشتغل، يبقى على الأقل مكتوب إنك حاصل على شهادة مُعينة،
2. شهادة التجنيد: موقفك من التنجيد بيتكتب في الباسبور عشان أكيد ماينفعش تكون مطلوب من التنجيد في بلدك وإنت رايح تقدم على سفر! وبكده بتضمن إن شرطة الجوازات مش هتوقفك أو تعترض طريقك وإنت خارج من المطار، وده في حالة إنك مش على قائمة الممنوعين من السفر،
3. كدا يبقى عليك وعلى مصلحة الجوازات عشان تستخرج جواز سفر، وهنا مطلوب منك البطاقة وصورتها، شهادة المؤهل الدراسي، شهادة التنجيد، 3 صور شخصية، والسجل التجاري والبطاقه الضريبيه لو إنت صاحب عمل وتستني تلات أيام عشان تستلمها وكده يبقى إنت معاك باسبور،
4. الخطوة الجاية هى إنك تحدد البلد اللي عايز تسافرلها وتقرر هى سياحة ترفيهية، سياحة علاجية، سياحة عمل، إلخ، لأن ده هيفرق معاك وإنت بتطلع الفيزا لأن مثلا لو إنت مسافر عشان تتفسح فالسفارة بتطلب إن يكون عندك حساب بنك عشان تضمن إنك مش هتبقى عبء على البلد وإن ليك دخل أو حساب تصرف منه. كمان مهم إنك تعرف إن فيه بلاد مش محتاج تطلع فيزا عشان تسافرلها زي ماليزيا، جزر المالديف، اندونيسيا، الأردن، وغيرها،
5. دلوقتي جه وقت إنك تطلع فيزا للبلد اللي إنت اخترت تروحها. محتاج يكون معاك باسبورك ويكون ساري لمدة مش أقل من 6 شهور، حجز تذاكر طيران وده بيكون من خلال شركات سياحة مضمونة وبتقدم خدمات حجز تذاكر الطيران، ولو إنت مسافر فسحة أو حد من أصدقاءك بعتلك دعوة فلازم يكون معاك ورقة إثبات إقامة، كمان يكون معاك شهادة المؤهل الدراسي أو السجل التجاري والبطاقة الضريبية لو إنت صاحب عمل، وتصريح سفر أمني وده عشان يثبت إنك مش متورط أو ليك أي نشاطات إرهابية وده بيكون لبعض الدول بس،
6. كده يبقى إنت خلصت كل الإجراءات اللي ليها علاقة بجواز السفر والتأشيرة، مش فاضل غير إنك تدور على شركة سياحة كويسة وتبدء إنك تحجز فندق وتحدد مدة إقامتك هناك.

وبكده يبقى إنت عرفت إزاي تخلص ورقك عشان تسافر بره وبقى معاك باسبور وفيزا … استمتع برحلتك !