مغامرات في أفريقيا

المغامرات في أفريقيا حاجة تانية خالص مُختلفة عن أي مكان تاني مُمكن تكون زُرته في حياتك يعني مهما تكون سافرت بلاد أوروبية، عشت مُغامرات غريبة، قضيت ليالي ولا ألف ليلة وليلة، في الآخر أفريقيا برضه هي اللي هتكسب وده لإنها واحدة من الأماكن القليلة حول العالم اللي مُحتفظة بطبيعتها والحضارة لسه ملمستهاش.

يعني السياحة في أفريقيا مش هتلاقي فيها وسائل ترف زي ما إنت فاكر، بالعكس هي أحلى حاجة فيها الحياة البدائية وإنهم ما زالوا مُحتفظين بجانب الطبيعة الخلابة زي ماهو.

خلونا نتكلم عن أماكن أفريقيا اللي مهما الإنسان حاول مش هيقدر يصنع نص جمالها.

• محمية ماساي مارا- كينيا: تخيل تكون عايش وسط الطبيعة الخضراء، شلالات المياه اللي بتخطف الأنظار، وحواليك الحيوانات البرية اللي مُمكن تكون مش موجودة غير هناك بس زي الأسود، النمور، الفهود، الفيلة، أفراس النهر، والزراف. مش بس كده، هناك كمان هتقدر تشوف الهجرة السنوية للخيول، الحمار الوحشي، وبقر النو. قبيلة الماساي قبيلة مُضيفة وودودة جداً برغم عيشتهم وسط الأدغال والحياة البرية إلا إنهم بيستقبلوا الزوار بترحيب كبير وبياخدوهم في جولات علشان يستمتعوا بالحياة البرية.

• شلالات فيكتوريا – زيمبابوي وزامبيا: شلالات فيكتوريا تُعتبر من أكبر الشلالات في العالم، عرضها تقريباً 1708متر وإرتفاعها 108متر. إتسمت الشلالات دي نسبة إلى الملكة فيكتوريا ملكة المملكة المُتحدة البريطانية، وبتقع في جنوب أفريقيا على نهر زامبيري رابع أكبر نهر في قارة أفريقيا. ناس كتير بتروح شلالات فيكتوريا لمُجرد الإستمتاع بالمنظر الجميل ده اللي بيساعدهم ينسوا أي هموم أو ضغوطات قدام جماله الخلاب.

• جزيرة مدجامب – موزمبيق: من أجمل وجهات شهر العسل وده بسبب هدوءها وجوها المُنعش، هتوفرلك إجازة مُمتعة وأجواء رومانسية مُميزة. ده غير الرياضات المائية اللي مشهورة بيها والمُرجان الأحمر اللي مُنتشر في بحرها بشكل مُثير جداً.

من الآخر لو بتدور على رحلة مُختلفة متتنسيش وإجازة وسط الطبيعة عشان تسترخي فيها وتنسى هموم الدنيا، يبقى أكيد مش هتلاقي أحسن من بلاد الأفارقة وطبيعة الحياة البدائية اللي لسه مُحتفظين بيها.