مهرجانات ومعالم ريو دي جانيرو

ريو دي جانيرو تاني أكبر مدينة في البرازيل هي واحدة من أجمل وأشهر مُدن العالم واللي كانت عاصمة البرازيل قبل إنشاء العاصمة الجديدة برازيليا ودلوقتي هي عاصمة ولاية ريو دي جانيرو.

سنة 2016 إستضافت ريو دي جانيرو دورة الألعاب الأولمبية وده كان سبب في زيادة السياحة فيها بشكل كبير جداً ده غير إنها في نفس السنة إستضافت لأول مرة أولمبياد ذو الإحتياجات الخاصة.

السياحة في ريو دي جانيرو

ريو دي جانيرو بتتميز بالمعالم والمناطق السياحية العظيمة واللي بتجذب السُياح ليها من كُل العالم.

من أشهر معالمها السياحية

• تمثال المسيح المُخلص
  التمثال ده يُعتبر رمز المدينة وموجود على قمة جبل ” كوركوفادو” بارتفاع حوالي 710 متر والوصول ليه بيكون عن طريق القطر،

• ملعب ماراكانا
  من أشهر ملاعب العالم ويُعتبر تاني أكبر ملعب في أمريكا الجنوبية. بيستضيف الملعب بطولات عالمية زي كاس القارات سنة 2013 وكاس العالم سنة 2014، وغيرهم كتير.
  طاقة الملعب الإستيعابية بتوصل لـ 78 ألف و 838 مقعد، وده بعد ما تم تقليصها بأمر من الفيفا،

• شاطئ كوباكابانا
  يُعتبر واحد من أشهر الشواطئ في العالم، طوله حوالي 4 كم، وبيطل على المُحيط الأطلسي.
  تُعتبر منطقة الشاطئ من الأماكن السياحية الصاخبة في ريو بسبب إنتشار المحلات، المطاعم، المقاهي، والملاهي. كمان بيشتهر بإنه أحلى مكان مُمكن تقضي فيه إحتفال رأس السنة وتستمتع بمهرجانات البرازيل الرائعة،

• جبل السُكر
  سبب تسميته إنه بيتكون من كوارتز وجرانيت بيوصلوا لإرتفاع 400 متر فوق مصب خليج غوانابارا.
  الوصول للجبل بيكون عن طريق رحلة جميلة بالتلفريك الزجاجي اللي بيتحرك كل 20 دقيقة وبيخليك تستمتع بجمال المدينة من فوق.

ريو دي جانيرو كمان بتشتهر بالمهرجانات والكرنفالات وأشهرهم مهرجان رقصات السامبا اللي بيحصل كُل سنة قبل عيد الفصح وبيستمر لمُدة أسبوع.

في الأسبوع ده هتلاقي الشوارع مليانه غناء، ومزيكا، ورقصات، وألوان مُبهجة.

تجربة ريو دي جانيرو تستحق الزيارة أكتر من مرة.